Gaztelaren ordua
Hamahirugarren mendean, Gaztelako Erregeek Nafarroakoek abiatutako
hiribiltze-politikari segida eman zioten. Bide honetan, bi une antzeman
daitezke, biak oso bestelakoak, bai tokiaren ikuspuntutik, bai eta
denboraren aldetik begiratuta ere.
Errege-ekimenak
Lehendabiziko hiribildu-sorta mendearen hasierakoa dugu, eta Gipuzkoako
kostaldeari dagokio. 1203. eta 1237. urteen bitarteko epealdi honetan,
bi errege nabarmendu ziren: Gaztelako Alfontso
VIII.a eta Fernando
III.a.
Alfontso VIII.ak Hondarribiari (1203.ean),
Getariari eta Mutrikuri
(biei 1209.ean) eman zien hiribildutasuna. Fernando III.ak, berriz,
Zarautzi 1237. urtean.
Modu horretan, Gaztelako botereak Gipuzkoako kostaldea bere alde
lerrokatzea lortu zuen. Eragina bikoitza zen, Nafarroako Erresumaren
komertzioari ere muga ezartzen zion eta.
Litekeena da lehenengo bultzada hau Jaun Handien presioaz gelditu
behar izatea. Izan ere, Jaun hauen leialtasuna ezinbestekoa zitzaion
Gaztelako Erregeari euskal mendebaldearen kontrola Nafarroak berreskuratuko
ez bazuen. Beraz, Gaztelak hiribiltze prozesuari etenaldi bat eman
zion, Nafarroako Erregeek izandako arazoak ez pairatzeko.
Bigarren bultzada, aldiz, Alfontso
X.aren eskutik etorri zen. Honek, Segura
eta Tolosa (1256. urtean), Arrasate
(1260an) eta Ordizia zein Bergara
(1268an) eraman baitzuen hiribildu izatera. Beraz, hamalau urtetan
bost hiribildu sortu zituen gure lurraldean.
Hiribildu berriei esker Gaztelak Nafarroako Erresumaren harremanak
oztopatu edo kontrolatu egiten zituen. (Segurarekin batera, adibidez,
Aizkorriren beste aldean Agurain Salvatierra bilakatu zen). Izan
ere, hiribildu hauek bide-gurutzeetan zeuden, ibaiek eta bide zaharrek
bat egiten zuten tokietan, alegia. Tradiziozko bide hauetan zehar,
Nafarroako komertzioak kostaldera iristea bazuen eta.
Hau da, mende hasieran Gaztelak bideen helmugak jarri zituen bere
menpean. Mende erdialdean, berriz, bideak batzen zituzten loturak.
Kontrol hau mende bukaeran berretsi zen, 1294. urtean Antso
IV.ak Itziar hiribildu
bihurtu, era horretan Gipuzkoako kostaldeko azken muturra bere sarean
guztiz txertatuz.
Herritarren ekimena
Hamalaugarren mendean zehar hiribildu-sortzearen ezaugarriak aldatu
ziren. Orain, Erregeen ekimena baino, herrietako eskaera topatuko
dugu. Jendeak hiribilduan bizitzeko aldarrikapena egiteak bizimodu
horren balioa berretsiko luke. Hau da, hala Ahaide
Nagusien aurrean nola ekomomia suspertzeko unean, hiribilduaren
eredua arrakastatsutzat joko zen garai hartan.
Hiribildu berri hauek paratzeko aukeratu ziren kokapenak aipatutako
arrakasta horren lekuko ditugu ere, asko eta asko hiribildu zaharrek
sortutako komunikazio sare berrian, ibaien ibarren ondoan, finkatu
baitziren. Kasu batzuetan, gainera, hiribilduen jatorrizko lekua
desegokitzat jo eta lekuz aldatuko dira.
Koroaren interesak ere biztanleen nahiekin bat egin zuen. Ez soilik
ekonomia hobetze aldera, Jaun Handien boterea murrizteko ere bai.
Hortaz, garai honetako hiribildu ugari Deba arroan topatzeak ez
gaitu harritu behar, Bizkaiko Jaurerriarekiko muga marrazteko mudu
egokia zelako eta orobat, hein handi batean, baita Gebarako leinu
eta Jaunaren botere-gunean eragiteko modu bat.
Denborari dagokionez, berriz ere bi epe zehaztu ahal ditugu. Lehenengoan,
Azpeitiko hiribilduarekin batera (Fernando
IV.aren eskutik 1310. urtean), Alfontsok
XI.aren menpean sorturiko multzo zabala dugu: Orereta
(1320an), Azkoitia (1324an), Gatzaga
(1331n), Elgeta (1335ean), Soraluze
eta Deba (1343an), Eibar
eta Elgoibar (1346an) eta Zumaia
(1347an).
Mende honen bigarren aldian, berriz, Usurbil
(1371n) Enrike
II.ak emana agertzen zaigu; gero, Juan
I.arekin, Orio (1379an),
Hernani (1380an), Zestoa
(1383an) eta Urretxu (1383an) datoz.
Urretxurekin Erdi Aroko hiribildu-sortze prozesua bukatutzat ematen
da. Honek ez du esan nahi herri gehiagok hiribildu maila lortu ez
zuenik. Hurrengo mendeetan ere auzo eta herrixka ugarik egin zuen
aldarrikapen bera. Batzuek berehala eskuratu zuten eskatzen zuten
maila juridikoa; beste batzuek, auzi luze baten ondorioz lortu zuten;
eta, oraindik ere, badira Gipuzkoan burujabetasunaren zain dauden
herriak.
|