Hiribilduak: Gipuzkoaren ezinbesteko osagai
HIRIBILDU hitza arrotz samar suertatzen bazaigu ere,
bere esanahia oso adierazgarria da. Izan ere, hitz horrek ederki
laburbiltzen du Erdi Aroan Europako bizimoduaren antolaketak nozitu
zuen eraldaketa: bestelako bizimodua alboratu eta “Hiri baten
moduan biltzea”, alegia.
Hiribilduen sorrerak funtsezko aldaketak ezarri zituen
egun Gipuzkoa bezala ezagutzen dugun lurraldean. Hiri-guneen garapenak
ordura arte guztiz mugatuta ez zegoen lurraldearen eraldaketa bultzatu
omen zuen-eta. Beraz, hiriek gizartea berritu eta moldatu zutela
esan dezakegu.
Iritzi honekin aditu gehienak ados badaude ere, hiribilduek
aldatu zuten gizarte hura irudikatzea eta ulertzea askoz zailagoa
suertatzen zaigu. Horregatik, hirien aurreko gizarte-antolamenduari
buruz erantzunak baino, galdera dira nagusi oraindik-orain.
Esan bezala, hiribilduak Gipuzkoako osaketan eta itxuraldaketan
aurrerapauso garrantzitsuak izan ziren. Orokorrean, XIII. mendera
arte Gipuzkoak betetzen zuen gunea finkatu gabe zegoela esan dezakegu.
Sasi-osatu Gipuzkoa horretan, bailaratan antolatutako giza-taldeak
sakabanatzen ziren, gune zabaletan eta mendi magaletan. Hau da,
gizartearen ardatza ez zen kokatuko lur eremu finko batean, sakabanatu
giza-multzoetan baizik.
Hiribilduak ugaldu ahala, berriz, bailara horiek zatitu
egin ziren. Zatiketa honetan, hiribilduak beren inguruaren gune
nagusiak bilakatzen ziren. Ondorioz, ordura arte bizitzeko hobetsiak
ziren mendi altzoak maila apalago batean geratu ziren. Hamalaugarren
mendetik aurrera, beraz, gure lurraldeak ez ditu mendietako herrixkak
ardatz izango, ibai arroetan hedatzen diren bizilekuak baizik.
Hiribilduen aurreko egoera hau ulertzen laguntzeko,
ondoko mapak proposatzen ditugu:
handitzeko irudia sakatu |
handitzeko irudia sakatu |
|