Ereduaren arrakasta
Hamalau eta hamabosgarren mendeetan zabaldutako giro eta segurtasun
ezaren eta hiribilduetako bizimoduaren arrakastaren erakusle hiri
hauen eskumena zabaldu izana dugu.
Erregeek eta hiribilduek elkarrekin sortutako harreman ereduari
jarraituz, Gipuzkoako hainbat tokik hiriek eskaintzen zuten babesa
bilatu zuten. Hirbilduetako barne-araudiak eta, batez ere, epailearen
lanak egiten zituzten alkateek bermatzen zuten babes hori. Alegia:
elkartze honetan, hiribiltze-prozesu orokorrean parte hartu ez zuten
herrixkek aurkitzen zuten abantailarik nagusiena hiribilduetako
alkatea epaile bezala izatea zen. Horrela, euren buruak Ahaide Nagusien
eskumenetik kanpo jartzen zituzten.
Beraz, hiribilduetako eskumenaren barruan, harresitutako gunea
ez ezik landa eremuak ere sartzen ziren. Batzuetan, landa eremu
hauek hiribilduaren sorreran egokitutako herri edo baserri ziren.
Beste alditan, goian esan bezala, beranduago atxikitako herrixkak.
Bat egin arren, herrixka hauek beraien muga, ordezkari eta udal
kudeaketa orokorrari eusten zieten. Hiribilduek atxikimendu hauei
esker jasotzen zuten onurak bestelakoak ziren, bizilagun berri hauek
auzoko propio bezala zenbatzen ziren-eta. Modu honetan, hiribilduaren
auzokoen kopurua handitu eta Probintziako erakundeetan bozkatzeko
garaian hiribilduaren bozkaren balioa ere handitzen zen.
Elkarlan hau emankorra eta onuragarria baldin bazen ere, atxikimenduak
eragin zituzten baldintzak aldatu eta hiri eta herrien arteko tira-birak
areagotu ziren. Izan ere, Hiribilduak Gipuzkoako kontrola eskuratu
ahala eta Ahaide
Nagusien mehatxua desagertu ahala, herri txikiek bere
erabateko burujabetasuna berreskuratzea nahiago zuten. Prozesu hau,
baina, hamazazpigarren mendean bizkortuko da; orain lantzen ari
garen epetik kanpo, beraz.
|