Elezaharretan badago
zer ikasi
Bi pasadizo hauetan, badira hiribilduen eta beraien aurreko gizartearen
arteko harremanak mintzo zaizkigun gertakizunak.
Adibidez, bietan oso bestelakoak diren bi mundu agertzen dira:
mendiarena eta hiriarena: Jentilbaratza edo Murugain, alde batetik;
eta Arrasate edo Beasain, bestetik.
Bietan ere, mendi magaletatik abiatu prozesu baten berri ematen
zaigu. Batean, jentilak (arbasoak) Jentilbaratzatik Beasainera iristen
dira, Lazkaotik pasatzen. Bestean, Murugainetik eta kobazuloetatik
Arrasateko Santa Barbaraino. Bigarren honetan, gainera, Murugain
lekuizena agertzen zaigu, herrixka zahar baten kokapen adierazten
duen tokizena, hain zuzen ere. Bizitokiak mendietatik hiribilduetatik
aldatu direla, alegia, ageria gelditzen da.
Biak eta biak ere, garaileen ikuspuntutik kontatzen diren istorioak
ditugu. Hau da: Gipuzkoa ordenatzeko garaile suertatu diren eta
ibai arroan bizileku finkatu duten hiribilduen ikusmoldetik. Hiritar
hauek mendi magaletan oraindik bizi direnak inozotzat (jentila)
ala basatitzat (herensugea) jotzen dituzte, bizimodu hauek atzeratuak
gelditu direlarik. Ikusmolde honetan, hiritarrek gune garatu bezala
dute bere burua, kristautasunari, burdinaren ekoizpen hobetsiari
(bietan burdina gori-gorian jartzeko gaitasuna aipatzen baita) eta
merkataritzari esker.
|