Amaiurko gaztelua eta museoa bisitatzeko sistema berria jarri da martxan
Arkeologia / Arkeologia indusketa
Larunbata, 2026eko abuztuaren 8a — CEST
— Testua: Aranzadi
Irakurketa: 4 minutu
Amaiurko Gaztelua Fundazioak kudeaketa eredu berria ezarri du ondare historikoaren kontserbazioa bermatuko duena eta bisitariei kalitatezko esperientzia eskainiko diena.
Amaiur etorkizunera begira eraikitzen den ondare bizia da eta memoria historikoaren sinbolo izaten jarraitu nahi du. Horretarako Amaiurko Gaztelua Fundazioak berrikuntza nabarmenak ezarri ditu udara honetan Amaiurko gaztelua eta museo arkeologikoa bisitatzeko. Neurri hauen helburu nagusia bisitariei kalitate handiagoko esperientzia eskaintzea da, eta, aldi berean, Nafarroako historiaren eta memoria kolektiboaren ikurra den gune honen kudeaketa ekonomikoki iraunkorra bermatzea.
ARO BERRIA AMAIURREN: BISITA-SISTEMA ETA HARRERA HOBETUA
Uztailetik aurrera gazteluaren sarbidea egokitu eta antolatzeko ate birakaridun sistema berria jarri da. Antolakuntza honek aztarnategiaren zein museoaren bisitarien fluxua hobeto kudeatzea ahalbidetuko du.
Bisita-esperientzia modu ordenatuan bermatzeko asmoz, museorako sarrerak zein gaztelurako bisita gidatuak aurretik erreserbatu edo erosi beharko dira. Gaztelurako sarrera indibidualak internet bidez eskuratu ahal izango dira, edota aztarnategiaren oinean bertan (baselizaren atarian) jarritako salmenta-makina automatiko berrian.
Beste berritasunetako bat da Museoa kokapen berri batera lekualdatu dela, Agerreako etxe dotorera hain zuzen ere, zeinaren birgaitze-obran bailarako etxeen berezitasunari eutsi baitzaio. Etxea bera ere euskal etnografiaren sinboloa da. Museo honek aukera ematen du gazteluko indusketetan aurkitutako material arkeologikoak eta piezak ezagutzeko (Amaiurko ezpata, garaiko gerra-material ugari, kañoi bolak, zurezko baldea, etab.). Bisitariak aztarnategiaren historia, aurkikuntzak eta Amaiurko gazteluaren balio historikoa sakonago ezagutzeko aukera izango du.
Tarifa berriak eta doakotasuna:
- Gaztelurako zein museorako sarrera arrunta 2,50 eurokoa izango da (museorako 1 euro 6 eta 11 urte arteko haurrentzat).
- Bi guneak biltzen dituen sarrera konbinatuak 4 euro balio du.
- Bisita gidatua eta museoa barne hartzen dituen aukera 6,50 euroan eskainiko da (3,50 euro 6 eta 11 urte arteko haurrentzat eta 4,50 euro pertsonako 20 lagunetik gorako taldeentzat).
- Baztango herritarrek doako sarbidea izango dute bi guneetan, dagokion txartela erakutsiz.
ONDAREA BABESTEA ETA ETORKIZUNEKO ERRONKAK
Sarrera eta bisita-sistema berri honen bidez bildutako baliabideek gazteluaren kontserbazio eta mantentze-lanak finantzatzen lagunduko dute. Horrela, Amaiurko Gaztelua Fundazioak sendotu egiten du indusketa arkeologikoekin jarraitzeko, aurkikuntza berriak ikertzeko eta Nafarroako memoria historikoa hezkuntza- eta dibulgazio-jardueren bidez zabaltzeko konpromisoa.
Azkenik, fundazioak herritarren parte-hartzea, auzolana zein erakunde publiko eta pribatuen lankidetza sustatzen jarraituko du, mezenasgoa eta dohaintzak bultzatuz, Amaiur nazioarteko erreferente bihur dadin ondare historikoaren babesean eta zabalkundean.
AURREKARIAK. AMAIUR, ONDARE BIZIA
Ondarea berreskuratzetik kudeaketa integrala izatera
Amaiurko gazteluaren berreskurapen zientifikoak mugarri nagusia izan zuen 2006an, Aranzadi Zientzia Elkarteak indusketa arkeologikoak hasi zituenean. Lan horiek funtsezkoak izan ziren egitura arkitektonikoa eta historia hobeto ezagutzeko; izan ere, harresiak, dorreak, ate nagusia, ur-biltegia eta balio handiko aztarna ugari berreskuratzea lortu zen, gazteluaren garrantzi historiko nahiz zientifikoa sendotuz.
2021ean Amaiurko Gaztelua Fundazioa sortu zen, Gaztelu Elkarteak 1978az geroztik egindako herri-lanari jarraipena emateko asmoz. Fundazioak bere gain hartu zuen gazteluaren, museoaren eta bisitari-zentroaren kudeaketa integrala, ondarearen babesa epe luzera bermatzeko.
500 urteren ondoren, etorkizunera begira dagoen memoria
- urtean, gazteluaren erorketaren 500. urteurrena ospatu zen Amaiurren. Urte osoan zehar antolatutako ekitaldi instituzionalek, kultur jarduerek, hitzaldiek, erakusketek eta oroimen-ekitaldiek herriaren garrantzi historiko eta sinbolikoa azpimarratu zituzten gizarte osoaren aurrean, eta proiektuari gogo nahiz bultzada berritua eman zioten.
Urteurren horren bidetik dator 2026ko mugarri berria: Museoaren lekualdatzea. Bertan gainera denda txiki bat dago souvenirrak, liburuak, maketak eta abar saltzen dituena. Kokapen berri honekin, gaztelurako atarian bertan, herritarrek nahiz bisitariek modu integratuan ezagutu ahal izango dituzte indusketetan berreskuratutako piezak, ikerketen emaitzak eta toki honen bilakaera historiko osoa.
INFORMAZIO GEHIAGO: https://www.amaiur.eus/museoa-bisitagidatuak/
