Begoñako hilerritik beste gudari deshobiratu dute

Tomás Rubin Marín Bilboko bizilaguna zen eta igeltsero gisa lan egiten zuen. Ezkondua eta hiru seme-alabaren aita, 33 urterekin 6ANV-1 Olabarri batailoian borrokatu zuen eta Arabako Villarreal batailan zauritu zuten. Ondoren, Zornotzako ospitale militarrera eraman zuten, eta bertan hil zen 1936ko abenduaren 3an.

Hiru hilabete geroago, 30 urteko emaztea bihotzekoak jota hil zen, eta hiru seme-alabak umezurtz geratu ziren. Gaur goizeko ekitaldira gazteena joan da. Familiak ez zekien non zeuden gudariaren gorpuzkiak, harik eta bilobetako batek Begoñako hilerrian lurperatu zituztela jakin zuen arte, baina duela hilabete gutxi arte non zeuden jakin gabe.

Begoñako Argia proiektuan jasotako informazioaren arabera, 60 pertsona lurperatu zituzten Begoñako hilerrian 1936tik 1945era bitartean, horien artean gudariak eta milizianoak, baina baita bonbardaketetan hildako biktima zibilak ere, zehazki 1937ko apirilaren 18an Cotorrueloko aterpea bonbardatu zutenean. Begoñako hilerria 2006an itxi zen, eta 1813tik 2003ra arte egon zen martxan. Memoria Historikoaren arloan zuen balioaz gain, XIX. mende amaierako eta XX. mendeko hilobi-arkitektura aztertzeko interes handiko multzoa ere badu.