Ondare europearraren astean bisita eta boluntariotza jardunaldiak

Ostirala, 2018eko irailaren 21a — CEST

Irakurketa: 2 minutu

Irulegiko gaztelua Iruñerrian hobekien ezagutzen eta mantentzen den Nafarroako Erresumako Erdi Aroko gotorlekua da. Gaur egun, gazteluaren ikerketa-lanak amaitzen, berau kontsolidatzen eta balioan jarraitzen dugu. Aldi berean, aztarnategia bere osotasunean ulerturik, Burdin Aroko herrixka gotortuaren inguruko ikerketekin hasi gara. Orain arte bezala, Arangurengo bailarako herritarrekin batera lan eginaz, gazteluko mantentze-lanak egin eta harresia zaharberrituko da. Irailaren 27 eta 29 bitartean egingo dira lanak eta bisitak.

Irulegi gaztelua

Amaiurko Gaztelua Nafarroako kultur ondare erreferentea da, 1522an gertatutako mugarri historikoaz geroztik mendeetan zehar nafar gizartean interes handia piztu duen gunea dena. Urtero legez, kontsolidazio lanak egin dira eraikinean, sarbide berria ireki eta 1 eta 2 sektoreen musealizazioa amaitu delarik. Zabalkuntza honen berri emateko Aranzadi Zientzia Elkarteak, Baztango Udalak eta Amaiurko Herriek bisita gidatua antolatu dute igandea, irailak 30erako.

Amaiur gaztelua

Urteetako ikerketaren ostean Asturica (Astorga) eta Burdigalam (Bordele) lotzen zituen Iter XXXIV erromatar galtzadaren zantzuak aurkitu dira Nafar Pirinioetan. Ondare hau ezagutarazteko larunbatean, irailak 29, Artzibar, Auritz eta Erroibarreko Udalek eta Aranzadi Zientzia Elkarteak Lusarreta eta Aurizberri bitartean dagoen erromatar galtzadaren zatia bisitatzeko aukera eskainiko dute. Txangoa Aranzadiko ikerlariek gidatuko dute eta inguruko paisaia eta bideari buruzko azalpenak emango dituzte, tartean eskualdean industen ari diren erromatar aztarnategiak aipatuz: Zaldua eta Artzi.