Ehunka bolondresek parte hartu dute Gasteizko hegazti habiagileen atlasa ikertzen

• Gasteizko Ingurugiro Gaietarako Ikastegiak eta Aranzadi Zientzia Elkarteak bultzatutako proiektua.
• Proiektu honen iraupena 3 urtekoa da. Faseak honela banatzen dira: prestakuntza, erroldak eta atlasa egitea.
• Proiektu honen funtsezko puntuetako bat herritarren partaidetza da.
• Bi hilabeteko epea irekitzen da liburuko irudiak aukeratzeko.

Gasteizko udalerria gero eta gertuago dago hegazti habiagileen atlasa argitaratzeko. Proiektu honek herritarren zientzia izan du oinarri eta hegazti-fauna maite duten gasteiztar askoren laguntzari esker egin ahal izan da. Hiri honek 100 hegazti habiagile espezie baino gehiago ditu.

Aranzadiko ornitologia saileko arduradunek azaldu zutenez, proiektuan 27 prestakuntza-ikastaro egin dira eta 803 pertsonak parte hartu dute. Ekimen honetan partehartze errekorra egon da eta antolatzaileek oso positibotzat jo dute. Gainera, agerian uzten du herritarrek beren hiriaren aberastasun ornitologikoarekiko duten interesa.

Proiektu honen funtsezko puntuetako bat hegazti-espezie horiek aukeratutako laukietan erroldatzea izan da. "Boluntario taldeka banatu ziren erroldatu behar genituen laukiak. Lan horretan 128 pertsonak parte hartu dute. Herritarren zientzia-lana, metodologia zientifikoarekin egin dena ".

Horrela, datuak biltzeko fasea amaitzen da, eta udalerrian habia egiten duten hegazti-espezie guztien emaitzak aztertzeko eta fitxak idazteko lanari ekiten zaio.

Gainera, proiektuaren arduradunek azaldu zuten herritarren lankidetza ez dela hemen amaitzen, gasteiztarrek beraiek aukeratuko baitute atlas horren diseinuaren zati bat. "Herritarrei eskatuko diegu beraiek aukera ditzatela liburua ilustratuko duten atzekaldeko irudiak. Normalean, hiriko leku enblematikoen edo ezagunen marrazkiak dira, eta 6 hegazti espezie bakoitzaren fitxan agertuko dira ".

Lan hori, beraz, hasieratik amaierara egin da, lankidetzari eta boluntariotzari esker.