El sidrón-eko (asturias) ume neandertal baten azterketa oinarri hartuta neandertalak nola hazten ziren berreraiki dute

Oso ondo kontserbatutako eskeleto partziala da, eta gizaki modernoekin alderatuta Neandertalaren hazkuntza-eredua aztertzeko erabili dute. Aztertzaileek 7.7 urteko heriotza-adina zehaztu zuten haginaren azterketa histologikoa eginda, eta adin kronologiko hori hortzak, osifikazio-zentro ugari eta gorputzaren neurria oinarri hartuta kalkulatutako adin biologikoekin alderatu zuten. “Heltzearen eta hazkundearen egungo ebaluaziorako ohiko metodoak aplikatuta, Neandertaleko ume hori ez da bereizten adin bereko egungo ume batengandik”, adierazi du Luis Ríosek. “Neandertal honen hazkundea eta garapena giza ontogeniaren ezaugarrietara egokituko litzateke, titia kendu ondoren gorputzaren hazkunde-etapa mantsoa izaten da, neurri handiko garuna hazteak dakarren energia-kostu handia konpentsatzeko”, jarraitu du ikerlariak.

Garunaren hazkundean eta ornoen heltzean alde txiki batzuk ikusi dituzte ikerlariek. “7.7 urteko adinerako, ornoen heltze-egoera 5 eta 6 urte arteko ume moderno batenak izango lirateke, eta aldiz, ebidentzien arabera garuna oraindik hazten ari zen, eta gizaki modernoetan, adin horietarako garunak dagoeneko lortu du helduen neurria”, adierazi du Rosasek, “Baina alde horiek Neandertalaren ontogeniaren doikuntza fin gisa har litezke gizaki modernoarenarekin alderatuta. Heltze- eta hazkuntza-eredu orokorra gizaki modernoenaren oso antzekoa da”.

Antonio Rosas, Luis Ríos, Almudena Estalrrich, Helen Liversidge, Antonio García-Tabernero, Rosa Huguet, Hugo Cardoso, Markus Bastir, Carles Lalueza-Fox, Marco de la Rasilla, Chris Dean. The growth pattern of Neandertals, reconstructed from a juvenile skeleton from El Sidrón (Spain). Science 357:1282-1287. DOI:10.1126/science.aan6463