Aranzadi Zientzia Elkarteak irailaren 7ko ilargi-eklipse osoa behatzera animatzen du
Astronomia / Behaketa astronomikoa
Osteguna, 2025eko irailaren 4a — CEST
— Testua: Aranzadi
Irakurketa: 2 minutu
Datorren igandean, irailak 7, zeruak ikuskizun bat eskainiko du, ilargi eklipse oso bat, ilargia ikus daitekeen leku guztietatik behatzeko modukoa. Aranzadi Zientzia Elkarteak fenomeno natural horretaz gozatzeko deia egin die herritarrei, Ilargiak kolore gorrixka hartuko baitu ekialdetik irtetean.
Eklipsean zehar, Eguzkia, Lurra eta Ilargia lerrokatu egingo dira, gure satelitea Lurrak proiektatutako itzalean sar dadin eraginez. Aranzadi Zientzia Elkarteko Astronomia Saileko Virginia Garciak azaldu duenez, "osotasunaren fasea 19:20tik 21:00etara izango da, baina gure lurraldean ez da 20:29ra arte ikusiko, orduan Ilargia erabat eklipsatuta agertuko baita. Une horretatik aurrera, "Ilargi gorria" ikusi ahal izango dugu 21:00ak arte. Fenomenoa 22:00ak aldera amaituko da, Ilargiak lurreko itzala erabat utzi eta ilargi betearen ohiko itxura berreskuratzen duenean ".
Nola behatu eklipsea
Aranzadik gogorarazi du ilargi-eklipseak seguruak direla ikusmenerako eta ez dutela inolako babes berezirik behar. Gomendatzen da leku altu batera joatea, eta ekialdea oskarbi dagoela, ilunabarra baino lehen, Ilargiaren irteera argi eta garbi ikusi ahal izateko. Zerua erabat ilun ez dagoenez, arreta jarri beharko da ñabardura gorrixkak bereizteko.
Zergatik ikusten da Ilargia gorri?
Ilargia Lurraren itzalean geratzen denez, eguzki-izpiek atmosferaren zati handiagoa zeharkatu behar dutelako da tonalitate gorrixka. Prozesu horretan, argi urdina eta berdea sakabanatu egiten dira, eta tonu gorrixka eta laranjei dagozkien uhin-luzerarik luzeenak baino ez dira iristen satelitera.
Aranzadi Zientzia Elkarteak, oraingo honetan, ez du jendaurreko behaketa ekitaldirik antolatuko, baina begi hutsez behatu ahal izango den fenomeno natural honetaz gozatzera gonbidatzen gaitu. Eta gogorarazi nahi du zeruaren behaketa unibertsoaren ezagutza zientifikora eta edertasunera hurbiltzeko aukera bat dela.
