Eskoletako urmaelen Sareko V. topaketak urmaeletako erabilera didaktikoak jarri du azpimarra

Begoña Pedrosa Hezkuntza sailburua Azkoitian izan den Eskoletako Urmaelen Sarearen V. Topaketan izan da gaur goizean. Berarekin batera, Aranzadi Zientzia Elkarteko kide Paul Minguez eta sareko batzordekideak izan dira.

Urtez urte gero eta ikastetxe gehiago biltzen dituen sare honek, urmaelaren erabilera didaktikoa sustatu nahi du eta ikastetxeen arteko saretzea, elkarlana eta trukaketa bultzatu. Horretarako, joan den urtean, sareak pausu berri bat eman zuen bere antolaketan, eta Eskoletako Urmaelen Sareko Batzordea sortu zuen, Aranzadi Zientzia Elkarteko, Berritzegune Nagusiko, EHUko, Neikerreko eta Euskal Herriko lau ikastetxetako partaideekin.

Egun, batzordea osatzen duten erakundeek bultzatuta eta gidatuta, hainbat formazio eskaintzen dira irakasleentzat, ondoren ikasi duten guztia ikastetxean zabaldu eta ikasleekin martxan jartzeko. Azken urte honetan, ahalegin berezia egin da zientziaren didaktikari buruzko ikastaroak eskainiz. Izan ere, sareak berak bultzaturiko ikerketa batek ondorioztatzen duen bezala, urmaela laborategi natural paregabea da zientziaren konpetentzia ikasleekin lantzeko. Horrez gain, ordea, biodibertsitateari buruzko lanketa bultzatzeko, edota alfabetatze ekologikoari buruzkoak sustatzeko eremu aproposa da, bai eta hezkuntzan landu beharreko konpetentziak garatzeko ere.

Izan ere, Pedrosa sailburuak adierazi duenez, “tresna didaktiko berritzaile gisa balio handia” dute urmaelek. "Toki apartak dira, ikasleei beren gaitasun zientifikoa garatzeko, ingurune naturalaren behaketaren, esperimentazioaren eta azterketaren bidez ikasteko aukera ematen die", adierazi du. Halaber, azpimarratu duenez, "ekosistema horiek zuzeneko esperientzian oinarritutako jakin-min zientifikoa, jasangarritasuna eta ikaskuntza sustatzen dituzte, ikasleei metodo zientifikoa aplikatzeko eta pentsamendu kritikoa indartzeko aukera emanez".

Erabilera didaktikoa eta inpaktua gizartean

Elkar ezagutza, parte-hartzea eta elkarlana bultzatzeaz gain, Topaketak indar berezia jarri nahi izan du urmaelean bertan egiten diren jardueretan eta erabilera didaktikoan. Ikastetxeez gain, Aranzadi Zientzia Elkartea, Berritzegune Nagusia, Euskal Herriko Unibertsitatea eta Neiker bezalako erakundeak ere izango dira bertan, sareko ikastetxeen aholkulari eta gidari modura.

Hori guztiaz gain, batzordeak ikasturtean zehar egindako hEUSnarketa aurkeztu du, Eskoletako Urmaelen Sareak gizartean izan duen inpaktua azaltzeko. Azken urteetan ikerketaren lerroak ere pisu handia hartu du sarean, eta EHUren bitartez, hainbat publikazio eta hitzaldi eman dira nazioarteko kongresuetan. Helburua da ikerketa horien emaitzak, era berean, ikastetxeen egunerokoan lagungarri izatea, erabilera didaktiko egokiago bat egiteko. Hargatik, Topaketan horiek aurkezteko tartea ere hartuko da.

50 ikastetxe Eskoletako Urmelen Sarean

Eskoletako Urmaelen Sarea (EUS) urmaela edo aintzira duten eta horien erabilera didaktikoa egiten duten ikastetxeen sarea da. Lehenbiziko urmael didaktikoa 2013an egin zen eta zazpi urteren buruan sarea sortu zen. Ordutik, urtez urte, handitzen joan da sare hori, egungo 50 ikastetxeko kopurura iritsi arte. Ikastetxeez gain, alabaina, Euskal Herriko Unibertsitateko (EHU) hiru Campusek ere parte hartzen dute.

Urmaelak ekosistema bereziak dira, azken urteetan beherakada oso handia jasan dutenak. Hori dela eta, hezegune txiki horiek sortzean, naturarekin justizia egiten da: gizakiak desagerrarazi zuena, gizakiak berreskuratzen baitu. Urmaelak auzolanean sortzen dira adituen jarraibideak jarraituz eta hezkuntza komunitate osoaren parte-hartzea ez ezik, leku askotan herritarren parte-hartzea ere bultzatzen da, beti ere ikasleetan arreta berezia jarriz.

Urmaelen Sarearen webgunea: https://www.urmaelaeskolan.eus/orri-nagusia

Aurrekoa

Hurrengoa

Mezenasgoa

Enpresen eta erakundeen laguntzari esker, gure gizarteari eta natura-inguruneari aurrera eginarazten dioten proiektuetan lanean jarraitzeko aukera dugu.

Bere babesa eman diguten erakundeak:

Informazio gehiago