Zinema-tailerra Habitata filmatzea
Emailea: Malen Nicholsonen eskutik - Antropologoa, zinegilea eta hezitzailea
Jarduera hau Urban Fauna Resort proiektuaren barruan kokatzen da. Proiektuak artearen eta hiri-biodibertsitatearen arteko harremana aztertzen du, intsektuentzako babesleku gisa pentsatutako hiru instalazio artistikoren bidez.
Malen Nicholsonek emango duen Habitat bat filmatu tailerra Nekane Azpiazu arkitektoaren Walls into Porous Boundaries lanean inspiratuta dago. Cristina Enea parkean kokatutako horma porotsu horrek hiri-ingurunea eta natura lotzea du helburu, hainbat espezieri bertan bizitzeko aukera emanez. Pitzaduren, barrunbeen eta babesleku txikien bidez, obrak arkitekturaren eta hiri-biodibertsitatearen arteko bizikidetzarako aukera berriak irekitzen ditu.
Era berean, tailerrak elkarrizketa bat ezartzen du Eduardo Chillidak poeta eta artistei eskaini zizkien «etxeekin». La casa del poeta edo La casa de Goethe bezalako lanetan, eskultoreak espazioaren, mugen eta hutsuneen arteko harremanak aztertzen ditu, etxearen ideiari dimentsio eskultoriko eta poetikoa emanez.
Bi artistek garatutako etxe eta babeslekuen ideietatik abiatuta, tailerrak Cristina Enea parkean bizi diren intsektuek, anfibioek eta narrastiek sortutako arkitektura filmatzea proposatzen du. Hainbat kamera erabiliz, izaki bizidunek zuhaitzen sustraietan, azaletan, harrietan eta arrakaletan eraikitzen edo erabiltzen dituzten egiturak grabatuko ditugu. Haien lerroei, hutsuneei, geometriari eta ibilbideei arreta jarriz, bizileku dituzten espazio horien erretratu zinematografiko laburrak sortuko ditugu.
Urban Fauna Resort Aranzadi Zientzia Elkartearen eta Chillida Leku museoaren arteko lankidetza da, eta BiArtekomugi proiektuaren barruan kokatzen da. Esperientzia eraldatzaile horrek zientzia, artea, teknologia, mugikortasun aktiboa eta herritarren parte-hartzea uztartzen ditu.
